ആ പ്രത്യേകയിഷ്ടം...
വാട്സാപ്പിലെ സ്റ്റാറ്റസ് കണ്ടു സ്കൂൾ കാലത്തെ ഒരു സുഹൃത്ത് ഈയിടെ എന്നോട് പറഞ്ഞതാണ് "അവനു എന്നോട് ഒരുപ്രത്യേക ഇഷ്ടം ഉണ്ടായിരുന്നു... അത് പക്ഷെ പ്രണയമാണോ എന്നൊന്നും അവനു തിട്ടമില്ലെന്നു".പലതരം ഇഷ്ടങ്ങളുടെ നടുവിൽകിടന്നു നട്ടംതിരിയുന്ന നമുക്ക് എല്ലാവര്ക്കും അങ്ങനെ ഒരിഷ്ടം ഉണ്ടാകാനുള്ള സാധ്യത ഉണ്ട്. അവന്റെ പറച്ചിൽ കേട്ട് "നിനക്ക് വട്ടായോ"എന്ന് ഞാൻ ചോദിച്ചു. പ്ലസ് ടു കാലത്തെ സുഹൃത്തുക്കളുമായി പൊതുവെ യാതൊരു ബന്ധവും ഇപ്പോഴില്ല..അന്നത്തെ ഏറ്റവും പ്രിയപ്പെട്ടവരൊക്കെ ഇപ്പോൾ എവിടെയെന്നു പോലും അറിയില്ല.ആകെ കോൺടാക്റ്റിലുള്ള ഒരാൾ ഇവൻ മാത്രം ആണ്.ഞങ്ങൾ അന്നത്തെക്കാലത്തെ വഴക്കാളികൾ ആയിരുന്നു താനും.എപ്പോൾ കണ്ടാലും എന്നോട് വഴക്കുണ്ടാക്കലായിരുന്നു ഇവന്റെ പണി. ആൾക്ക് അന്ന് തരക്കേടില്ലാത്ത ഒരു പ്രണയവും ഉണ്ട്. കൂട്ടുകാരിയുടെ കയ്യിലിരുന്ന എന്റെ ഫോട്ടോ തട്ടിയെടുത്തു മോഡൽ പരീക്ഷ ഹാളിൽ കണ്ടിരുന്നിട്ട് വഴക്കും വാങ്ങി പ്രിൻസിപ്പാൾ ആ ഫോട്ടോ കൊണ്ട്പോയി അവരുടെ മേശയിൽ ഭദ്രമായി വെക്കാൻ അവസരം ഉണ്ടാക്കിയ ആളാണ് കക്ഷി.(ഞാൻ ആ സ്കൂളിൽ അല്ലാതിരുന്നതുകൊണ്ട് മാത്രം രക്ഷപ്പെട്ടവൾ ആണ്)
ഓ... പ്രത്യേക ഇഷ്ടത്തെ കുറിച്ചു പറയാൻ വന്നിട്ട് വിഷയം മാറിപ്പോകരുതല്ലോ... മ് ..എന്റെചോദ്യം കേട്ട് ഓനെന്നോട് തിരികെ ചോദിച്ചത് "നമ്മൾ ഒരേ ജാതിയിൽ പെട്ടവർ ആയിരുന്നെങ്കിൽ,ഞാൻ വന്നു നിന്റെ വീട്ടിൽ ആലോചിച്ചിരുന്നെങ്കിൽ എന്നെ വിവാഹം കഴിക്കാൻ നീ സമ്മതിക്കുമായിരുന്നോ?" എന്നാണ്.
ഉത്തരങ്ങൾക്ക് വേണ്ടി ആലോചിക്കേണ്ടി വന്നില്ലായെനിക്ക്. "ഒന്നാമത് വിവാഹം കഴിക്കാൻ ഒരാൾക്ക് കാണുന്ന യോഗ്യതകളിൽ ജാതിയും മതവും പൂരിപ്പിക്കാനുള്ള കോളം എനിക്കില്ല...രണ്ടാമത് നിന്നോട് എനിക്കുള്ള ഇഷ്ടം ഒരു സൗഹൃദം മാത്രമാണ്...നീപറഞ്ഞതു പോലെ ഒരു ഇഷ്ടം ഇതുവരെ നിന്നോട് എനിക്ക് തോന്നിയിട്ടേയില്ലാ ". ഞാൻ അവനെ പ്രണയിക്കുന്നു എന്നൊരു മറുപടി അല്ല അവനും പ്രതീക്ഷിച്ചിരുന്നത്...ആ പ്രത്യേക ഇഷ്ടത്തെക്കുറിച്ചായിരുന്നു അവനു അറിയേണ്ടിരുന്നത്.എന്റെ മറുപടി അവനിലുണ്ടാക്കിയ പ്രതികരണം പിന്നീടു അവൻ നല്കിയ മറുപടികളിൽ വ്യക്തമായിരുന്നു . അത് ഞാൻ കാര്യമാക്കിയില്ല. കുറെയേറെ ഞാൻ അവനെക്കൊണ്ട് സംസാരിപ്പി ച്ചു.എന്റെ ഉള്ളിലുള്ള പലചോദ്യങ്ങൾക്കും ഉത്തരം തരാനൊരാൾ വന്നുകിട്ടിയത് പോലെ ...
അവന്റെ മറുപടികൾ എന്നെ കൂടുതൽ ചിന്തിപ്പിച്ചുകൊണ്ടിരുന്നു...പക്ഷെ ഉള്ളിലുള്ള വാക്കുകളെ ആശയങ്ങളായി പുറത്തേക്കു കൊണ്ടുവരുന്നതിൽ ഞാനൊരു പരാജയമായിരുന്നു..തികട്ടി വന്ന ചോദ്യങ്ങളൊക്കെ രൂപമില്ലാത്ത തൊണ്ടക്കുഴിയിൽ തന്നെ ചത്തൊടുങ്ങിക്കൊണ്ടിരുന്നു.
ആഴ്ചകൾ കഴിഞ്ഞപ്പോൾ അന്ന് അവന്റെ മാനസികാവസ്ഥ എന്തായിരുന്നു എന്ന് മനസിലാക്കാൻ പറ്റുന്ന ഏറ്റവും നല്ല സാഹചര്യത്തിലാണിപ്പോൾ ഞാനുള്ളത്. പ്രതീക്ഷിക്കുന്ന മറുപടികൾ കിട്ടാതിരിക്കുന്നതിനേക്കാൾ,അപ്രതീക്ഷിതമായ മറുപടികൾ ഉണ്ടാക്കുന്ന പൊള്ളലിൽ ഉരുകിയില്ലാതാകുന്നു... ആ പ്രത്യേകയിഷ്ടത്തിന്റെ , നഷ്ടത്തിന്റെ വേദനയെന്തെന്നു ഇപ്പോൾ ഞാനും അറിയുന്നു.വാക്കുകൾ കൊണ്ടും മൗനം കൊണ്ടും ഒരുപോലെ മുറിവേൽപ്പിക്കാൻ കഴിയുന്ന ആളുകളെ നമ്മൾ തന്നെയാണ് ജീവിതത്തിൽ ഉണ്ടാക്കിയെടുക്കുന്നത്...ഒരുപക്ഷെ അവർ പോലും അറിയാതെയാണ് അവരെ നമ്മൾ ഉള്ളിലേക്കെടുക്കുന്നത്.
നഷ്ടമാകുന്ന ഇഷ്ടങ്ങളുണ്ടാക്കുന്ന വേദനകൾക്ക് ഒരു പ്രത്യേക സുഖമാണ്... "ഇങ്ങോട്ടില്ലയെന്നറിയുമ്പോൾ നമ്മളും അതനുസരിച്ചു പെരുമാറിയാൽ മതിയല്ലോ"എന്ന സുഹൃത്തിന്റെ തിയറിക്കൊപ്പം പോകാൻ എനിക്ക് കഴിയുന്നില്ല. പ്രതീക്ഷിക്കാത്ത മറുപടികളിൽ ഇഷ്ടമില്ലാതായിപ്പോകുന്നില്ലല്ലോ... വഴിയരികിൽ ആരും ചോദിക്കാനില്ലാതെ നിന്നൊരു പൂവ് തല്ലിക്കൊഴിച്ചിടുന്ന ലാഘവത്തോടെ ചിലർക്കു നമ്മളെ തട്ടിയെറിഞ്ഞു പോകാൻ കഴിയുമായിരിക്കും..ഒരു നമ്പർ ഡിലീറ്റ് ചെയ്യുമ്പോലെ ആളുകളെ, ഇഷ്ടങ്ങളെ ഓർമകളിൽ നിന്ന് ഡിലീറ്റ് ചെയ്യാൻ കഴിയാത്തതുകൊണ്ട് എന്റെ ആ ഇഷ്ടവും ഞാനും ഇങ്ങനെ തന്നെയുണ്ടാകും. അതങ്ങനെയാണല്ലേ ആ ഇഷ്ടം- ചിലർക്ക് നമ്മളോട്...നമുക്ക് മറ്റു ചിലരോട്...അവർക്കു മറ്റാരോടോ...!!! നീണ്ടു നീണ്ടു പോകുന്ന വഴികളിൽ എന്റെ ഇഷ്ടം അവസാനിക്കില്ലായെന്നൊരു വാക്കു ഒന്നുമർഹിക്കാത്തയാൾക്ക് ഞാൻ തരുന്നു...ഇതെന്റെയൊരു വാശിയാണ്... നിന്നെ കൂടുതൽ കൂടുതൽ ഇഷ്ടപ്പെടുക എന്നത്.......
